حوزہ نیوز ایجنسی کی رپورٹ کے مطابق، متولی حرم حضرت فاطمہ معصومہ سلام اللہ علیہا نے ۲۲ بہمن کی عظیم الشان ریلی سے خطاب کرتے ہوئے کہا کہ دشمن کی دھمکیوں اور سازشوں کے باوجود ایرانی قوم کا جذبہ پہلے سے زیادہ مضبوط ہوتا جا رہا ہے اور ہر دباؤ کے مقابلے میں عوام کا نظامِ اسلامی سے تعلق مزید گہرا ہو جاتا ہے۔
انہوں نے کہا کہ ۲۲ بہمن ہر سال اپنی ایک خاص اہمیت رکھتا ہے، تاہم رواں سال یہ دن اس لحاظ سے مزید نمایاں ہے کہ دشمن نے کھلے عام اور وسیع پیمانے پر نظامِ اسلامی کے خلاف محاذ کھولا ہے اور مختلف پیچیدہ حربوں کے ذریعے ملک کو نقصان پہنچانے کی کوشش کر رہا ہے۔
متولی حرم نے کہا کہ دشمن کبھی یہ حقیقت نہیں سمجھ سکا کہ جب بھی وہ ایران کو دھمکیاں دیتا ہے یا پابندیاں عائد کرتا ہے تو عوام کی شرکت میں مزید اضافہ ہو جاتا ہے۔ انہوں نے واضح کیا کہ معاشی مشکلات اور دیگر مسائل کے باوجود ایرانی عوام کے حوصلے پست نہیں ہوتے بلکہ ان کا عزم اور جذبہ مزید مضبوط ہو جاتا ہے۔
انہوں نے مزید کہا کہ دشمن دراصل ایرانی عوام کے دین، عزت اور شرافت کو نشانہ بنا رہا ہے، لیکن ایران کے دیندار، باوقار اور باعزت عوام، قومیتی اور لسانی اختلافات کے باوجود ایک قدر مشترک رکھتے ہیں اور وہ ہے دینی اور قومی غیرت۔ یہی غیرت انہیں ہر سازش کے مقابلے میں متحد رکھتی ہے۔
متولی حرم حضرت فاطمہ معصومہ سلام اللہ علیہا نے اس بات پر بھی زور دیا کہ رواں سال رہبر معظم انقلاب اسلامی کے ٹیلی ویژن پیغام نے عوام میں ایک نیا جوش اور احساسِ ذمہ داری پیدا کیا، جس کے نتیجے میں ملک بھر میں شاندار اور پرجوش شرکت دیکھنے میں آئی۔
انہوں نے عوام کی اس باشعور اور تاریخی موجودگی پر خصوصی شکریہ ادا کرتے ہوئے کہا کہ یہی اتحاد اور بیداری دشمن کے تمام منصوبوں کو ناکام بنانے کی ضمانت ہے اور ایران اسلامی کو مزید مضبوط بنانے میں اہم کردار ادا کرے گی۔
آپ کا تبصرہ